ఒక మహిళ.. ఒకే ఒక మహిళ.. నాయకులను మచ్చికచేసుకుంది. అధికారులను తన చుట్టూ తిప్పుకుంది. రచ్చరచ్చ అయ్యాక ప్రభుత్వం నష్టనివారణ చర్యలకు దిగింది. చివరికి ఆమె అరెస్టయ్యింది. నెల్లూరులో ఓ రౌడీ షీటర్‌ పెరోల్‌పై వచ్చి ఆస్పత్రిలో మహిళతో సరసాలు ఆడుతున్న దృశ్యాలు ఏపీలో వైరల్‌గా మారాయి. ఈ మేటర్‌ను ఏపీ సర్కార్ సీరియస్‌గా తీసుకుంది. రౌడీ షీటర్‌ పెరోల్‌ను రద్దు చేసి ఈ వ్యవహారంపై విచారణకు ఆదేశించారు హోంమంత్రి అనిత.
నెల్లూరులో శ్రీకాంత్ అనే రౌడీ షీటర్‌ పెరోల్ మీద బయటికొచ్చి, ట్రీట్‌మెంట్‌ పేరుతో ఓ ఆస్పత్రిలో చేరి హాస్పిటల్‌ బెడ్‌ పైనే తన ప్రియురాలితో సరసాలు ఆడుతున్న దృశ్యాలు బయటికొచ్చాయి. వెంటనే రౌడీషీటర్ శ్రీకాంత్ పెరోల్‌ని హోం మంత్రి అనిత రద్దు చేశారు. హోం సెక్రటరీని వివరణ కోరారు. శ్రీకాంత్‌కు పెరోల్ ఇవ్వాలని నెల్లూరు జిల్లాకు చెందిన ఇద్దరు ఎమ్మెల్యేల నుంచి సిఫార్సులు వచ్చాయని, ప్రభుత్వంలోని ఓ కీలక అధికారి సూచనతో ఈ నిర్ణయం తీసుకున్నట్లు సెక్రటరీ వివరణ ఇచ్చారు.
ఇంతకీ ఎవరా ఇద్దరు ఎమ్మెల్యేలు? ఓ రౌడీ షీటర్‌కు పెరోల్ ఇప్పించాల్సిన అవసరం వాళ్లకు ఎందుకొచ్చింది? రౌడీ షీటర్‌కు పెరోల్ ఇవ్వాలని అధికారులపై ఎందుకు ఒత్తిడి తెచ్చారనే ప్రశ్నలు తెరపైకొస్తున్నాయి. ఓ హత్య కేసులో దోషిగా తేలడంతో గూడూరుకు చెందిన శ్రీకాంత్‌కి కోర్టు జీవిత ఖైదు విధించింది. 2010 నుంచి నెల్లూరు సెంట్రల్‌ జైల్లోనే ఉన్నాడు. 2014 ఫిబ్రవరి 12న జైలు నుంచి తప్పించుకున్న శ్రీకాంత్.. 2018 నవంబరులో మళ్లీ పోలీసులకు దొరికాడు. అప్పట్నించీ జైల్లోనే ఉన్నాడు. పెరోల్ కోసం ఇటీవల శ్రీకాంత్ దరఖాస్తు చేసుకున్నాడు. కరడుగట్టిన నేరస్తుడికి పెరోల్ ఇవ్వొద్దని నెల్లూరు, తిరుపతి జిల్లాల ఎస్పీలు, నెల్లూరు జైల్ సూపరింటెండెంట్ అభ్యంతరం తెలిపారు. వాటిని బేఖాతరు చేస్తూ అతనికి 30 రోజుల పెరోల్ మంజూరు చేస్తూ హోం శాఖ ఉత్తర్వులు జారీ చేసింది.
శ్రీకాంత్ జైల్లో ఉండగా అతడి గ్యాంగ్‌ను తానే నడిపిస్తూ దందాలు చేయిస్తున్న ప్రియురాలు అరుణ.. నెల్లూరు జిల్లాలోని కొంతమంది రాజకీయ నాయకులతో పాటు సెక్రటేరియట్‌లోని కొందరు ఉన్నతాధికారులను ప్రభావితం చేసి మరీ ఈ పెరోల్ మంజూరు చేయించారని చెబుతున్నారు. నిబంధనల ప్రకారం ఆస్పత్రిలో చికిత్స పొందుతున్నప్పుడు ఖైదీని ఎవరూ కలవకుండా చూసుకుంటారు. కానీ అరుణ ఎప్పుడు కావాలంటే అప్పుడు ఆస్పత్రిలో ఉన్న ఖైదీ శ్రీకాంత్ దగ్గరకు వెళ్లేది. అంత స్వేచ్ఛ ఇచ్చిందెవరు? పోలీసులను అంతగా ప్రభావితం చేసిందెవరనేదానిపై ఎంక్వయిరీ నడుస్తోంది. ఎంతవారలైనా కాంతాదాసులేనన్నట్లుంది నెల్లూరు అరుణ వ్యవహారం.
