ఇంత బతుకూ బతికి ఇంటెనకాల చచ్చినట్లే ఉంది ఆ సెలబ్రిటీ కపుల్స్‌ పరిస్థితి. నటి శిల్పాశెట్టి , ఆమె భర్త రాజ్‌కుంద్రాపై ముంబై పోలీసులు చీటింగ్‌ కేసులో లుకౌట్ సర్క్యులర్ జారీచేసేదాకా రావడం సంచలనం రేపింది. రూ.60 కోట్లు అప్పుగా తీసుకొని మోసం చేశారని దీపక్‌ కొఠారి అనే వ్యాపారవేత్త ఇచ్చిన ఫిర్యాదుతో కేసు నమోదయ్యింది. ముంబై ఆర్థిక నేరాల విభాగం ఈ కేసును దర్యాప్తు చేస్తోంది. అయితే కొఠారి తమపై తప్పుడు ఆరోపణలు చేస్తున్నారని శిల్పా శెట్టి,రాజ్‌కుంద్రా దంపతులు చెబుతున్నారు.
2015 నుంచి 2023 మధ్యకాలంలో శిల్పా-రాజ్ దంపతులు తనను మోసం చేశారని దీపక్‌ కొఠారి ఆరోపించారు. మొత్తాన్ని అప్పుగా తీసుకున్నప్పటికీ, తర్వాత పెట్టుబడిగా చూపుతూ పన్ను ఆదా చేసేందుకు ప్రయత్నించారని కొఠారి ఆరోపించారు. తీసుకున్న డబ్బును 12 శాతం వార్షిక వడ్డీతో సహా తిరిగి ఇస్తామని హామీ ఇచ్చారని, 2016 ఏప్రిల్‌లో శిల్పా శెట్టి తన వ్యక్తిగత హామీ పత్రాన్ని కూడా ఇచ్చారంటున్నారు కొఠారి. కానీ కొద్దికాలానికే కంపెనీ డైరెక్టర్ పదవి నుంచి శిల్పాశెట్టి రాజీనామా చేశారన్నారు. ఆ డబ్బును వ్యక్తిగత అవసరాలకు వాడుకున్నారని ఆరోపిస్తున్న ఆ వ్యాపారి.. కంపెనీపై రూ.1.28 కోట్లు విలువైన ఇన్సాల్వెన్సీ కేసు నడుస్తోందన్న విషయం కూడా తనకు చెప్పలేదన్నారు. దీనిపై ముంబై పోలీసులు ఇప్పటికే సంస్థ ఆడిటర్‌ను విచారణకు పిలిచారు. శిల్పా-రాజ్ దంపతుల ట్రావెల్ రికార్డులు కూడా పోలీసులు పరిశీలిస్తున్నారు.
కొఠారి ఆరోపణలు నిరాధారమని వాదిస్తున్నారు శిల్పాశెట్టి, రాజ్ కుంద్రా దంపతులు. కేసు విచారణ సమయంలో శిల్పా, రాజ్ దంపతులు దేశం విడిచిపోకుండా పోలీసులు లుకౌట్ సర్క్యులర్ జారీ చేశారు. చీటింగ్‌ , నమ్మకద్రోహం తదితర సెక్షన్ల కింద ఎఫ్‌ఐఆర్ నమోదు చేశారు. మోసం విలువ రూ.10 కోట్లకు పైగా ఉండటంతో, కేసును జుహు పోలీస్ స్టేషన్ నుంచి ఆర్థిక నేరాల విభాగానికి బదిలీ చేశారు. శిల్పా శెట్టి భర్త రాజ్‌కుంద్రాపై ఇప్పటికే చాలా కేసులు పెండింగ్‌లో ఉన్నాయి. పోర్న్‌ వీడియోల కేసులో ఆయనపై విచారణ జరుగుతోంది. తాజాగా చీటింగ్‌ కేసులో లుకౌట్ సర్క్యులర్ జారీ కావడం సంచలనం రేపుతోంది.
