బిట్ కాయిన్‌కి భారీ షాక్‌ తగిలింది. ఆరు వారాల్లో బిట్ కాయిన్ 33 శాతానికి పడిపోయింది. ఒక్క కాయిన్‌పై దాదాపు 35 లక్షల రూపాయల నష్టం రావడం అందరినీ అవాక్కయ్యేలా చేస్తోంది. మొన్నటిదాకా ఆకాశాన్నంటిన క్రిప్టో కరెన్సీ ఇప్పుడు నేలచూపులు చూస్తోంది. మరీ ముఖ్యంగా క్రిప్టో రారాజు బిట్ కాయిన్ ఢమాల్‌మని పడిపోయింది. అమెరికా ఆర్థిక వ్యవస్థపై నెలకొన్న ఆందోళనలతో… డిజిటల్ ఆస్తుల అమ్మకాల్లో ఒత్తిడి పెరగడంతో ఏడు నెలల కనిష్టానికి పడిపోయిన బిట్ కాయిన్, మరింత పతనమయ్యేలా ఉంది. ఆరు వారాల్లో 33 శాతం పడిపోయింది. లక్షా 26వేల 296 డాలర్ల నుంచి 83 వేల 928 డాలర్లకు దిగజారింది.
24 గంటల్లో 905 మిలియన్‌ డాలర్ల పెట్టుబడులను ఇన్వెస్టర్లు వెనక్కి తీసుకున్నారు. అలాగే ఇన్వెస్ట్ చేసిన వాళ్లకు ఒక్క బిట్‌కాయిన్‌పై దాదాపు 35లక్షల నష్టం వాటిల్లింది. గ్లోబల్ క్రిప్టో మార్కెట్ నుంచి లక్షా 40 వేల ట్రిలియన్ డాలర్ల సంపద ఆవిరైంది. అమెరికా ఆర్థిక పరిస్థితులపై నెలకొన్న అనిశ్చితి కారణంగానే క్రిప్టో మార్కెట్ పతనమవుతోందని విశ్లేషకులు చెబుతున్నారు. సెప్టెంబర్ నెలకు సంబంధించిన ఉద్యోగాల డేటాలో నిరుద్యోగం ఊహించిన దానికంటే ఎక్కువగా నమోదు కావడం ఇన్వెస్టర్లలో ఆందోళన పెంచింది. దీనికి తోడు అమెరికా ఫెడరల్ రిజర్వ్ వడ్డీ రేట్లు తగ్గించదని తేలడంతో క్రిప్టో కరెన్సీలో పెట్టుబడులను ఇన్వెస్టర్లు వెనక్కి తీసుకుంటున్నారు.
అక్టోబర్‌లో నమోదైన 1,26,000 డాలర్ల గరిష్ట స్థాయి నుంచి బిట్‌కాయిన్ ఇప్పుడు దాదాపు 33 శాతం నష్టపోయి 83వేల 928 డాలర్ల వద్ద కొనసాగుతోంది. అదేవిధంగా, ఈథర్ కూడా ఆగస్టులో ఉన్న 4,955 డాలర్ల గరిష్ఠ స్థాయి నుంచి సుమారు 40 శాతం పతనమైంది. డిజిటల్ కరెన్సీలో బిట్ కాయిన్ ఎంత వేగంగా దూసుకెళ్లిందో అంతే వేగంగా పతనమవ్వడం ఆందోళన కలిగిస్తోంది. గ్లోబల్ ఆర్థిక ఒత్తిడులు, వడ్డీ రేట్ల పెంపు, ప్రభుత్వ నియంత్రణలు పెరగడం వంటి అంశాలు ఈ పరిస్థితికి దారితీశాయి. కొన్ని నెలలపాటు క్రిప్టో మార్కెట్ ఇలాంటి పరిస్థితినే ఎదుర్కుంటుందని… పెట్టుబడిదారులు జాగ్రత్తగా వ్యవహరించాలని సూచిస్తున్నారు నిపుణులు.
