కొత్త సిద్ధాంతంతో రాజకీయాల్లోకి దూసుకురావడం ఓ పద్దతి. అసలు రాజకీయ పుట్టుకకు మూలమే ఒక ప్రత్యేక సిద్ధాంతం. కానీ తమిళనాడులో మాత్రం ప్రతీ పార్టీది ఒకటే సిద్ధాంతం. ఏ పార్టీని కదిపినా వినిపించేది ద్రవిడవాద రాగమే. అందులోనే రాజకీయ అవకాశాలు వెతుక్కుంటారు. ఆ వాదంతోనే అధికారంలోకి వస్తుంటారు. ప్రజంట్‌ దళపతి విజయ్‌ది కూడా అదే దారి. కోలీవుడ్‌ స్టార్‌ హీరో విజయ్ స్థాపించిన తమిళగ వెట్రి కళగం (TVK) పార్టీ తమిళ రాజకీయాలను కుదిపేస్తోంది. 2024 ఫిబ్రవరి 2న పార్టీ అనౌన్స్‌ చేసినప్పటి నుంచి మిగిలిన పార్టీల్లో అలజడి మొదలైంది.
విజయ్‌కి ఫ్యాన్‌ ఫాలోయింగ్‌ బీభత్సంగా ఉన్నా అదే అధికారంలోకి తీసుకొస్తుందని చెప్పలేం. సభలకు జనం పోటెత్తుతున్నా అదంతా ఓట్ల రూపంలోకి మళ్లుతుందనే నమ్మకం లేదు. అందుకే కమల్‌హాసన్‌ జనాన్ని చూసి బోర్లాపడొద్దంటున్నాడు. ఎందుకంటే సినీ గ్లామర్‌కు పడిపోయే రోజులు కావివి. TVK సత్తా ఏంటో విజయ్‌కి కూడా తెలుసు. ఆ పార్టీ స్వయంగా చేయించుకున్న సర్వేలో దాదాపు 25 శాతం ఓట్లు వస్తాయని తేలింది. అందుకే ప్రచార యాత్రలు మొదలు పెట్టారు. కేవలం గ్లామర్‌నే నమ్ముకోకుండా పొలిటికల్‌ గ్రామర్‌తో ముందుకెళ్తున్నాడు.
ప్రస్తుతం విజయ్ శనివారపు యాత్రలు చేస్తున్నారు. సెప్టెంబరు 13 నుంచి డిసెంబర్ 20 వరకు మొత్తం 98 రోజుల యాత్రలో 38 జిల్లాలను కవర్‌ చేసేలా ప్లాన్‌ చేసుకున్నాడు. డీఎంకే, బీజేపీలు ఎత్తిపొడుస్తున్నా, అంత సీన్‌ లేదటున్నా.. TVK పార్టీకి క్రేజ్‌ పెరుగుతోంది. ఈ యాత్రలతో డిసెంబరు 20 నాటికి తమ ఓట్లను మరో 10 శాతం పెంచుకుంటామంటోంది TVK. అయితే అధికారంలోకి రావడానికి 35 శాతం ఓట్లు చాలవు. అందుకోసమే తన సిద్ధాంతాలు నచ్చి ఎవరొచ్చినా కలిసి ముందుకెళదామంటున్నాడు విజయ్. రండి అనగానే ఎవరూ రారనే.. అధికారంలో భాగస్వామ్యం ఇస్తానంటున్నాడు.
తమిళనాడులో రెండే కూటములు. ఒకటి డీఎంకే వెనక ఉన్న కాంగ్రెస్‌ అండ్‌ కో పార్టీలు. రెండు అన్నాడీఎంకేను నడిపిస్తున్న బీజేపీ అండ్‌ కో. TVK పార్టీ అధికారపీఠం దాకా రావాలంటే ఈ పార్టీల ఓట్లనే చీల్చాలి. అధికారంలో ఉండటంతో డీఎంకేపై ఎంతో కొంత వ్యతిరేకత ఉంటుంది. ప్రతిపక్షంలోని అన్నాడీఎంకే ఓట్లు కూడా చీలితే అది విజయ్ పార్టీకి కలిసొస్తుంది. రెండేళ్ల క్రితమే మాజీ సీఎం పన్నీరు సెల్వంను అన్నాడీఎంకే బహిష్కరించింది. ఆ తరువాత ఎన్డీయే వైపు వెళ్లినా.. ఈమధ్యే ఆ కూటమి నుంచి కూడా బయటికి వచ్చేశారు. పన్నీర్‌ సెల్వంతో పాటు అన్నాడీఎంకే బహిష్కృత నేత సెంగొట్టైయ్యన్‌ కూడా విజయ్‌వైపు వెళ్లేలా ఉన్నారు.
DMDKని అన్నీ తానై నడిపిస్తున్నారు దివంగత నేత కెప్టెన్‌ విజయ్కాంత్ సతీమణి ప్రేమలత. విజయ్కాంత్ ఏ ఆశయాల కోసం పార్టీ పెట్టారో.. అవే విజయ్ పార్టీలోనూ కనిపిస్తున్నాయంటున్నారు. అంటే టీవీకే కూటమిలో డీఎండీకే దాదాపు చేరుతున్నట్లే లెక్క. ఇక టీటీవీ దినకరన్‌ పార్టీ AMMK మొన్నటిదాకా ఎన్డీయే కూటమిలో భాగస్వామి. ఈమధ్య ఆయన కూడా విజయ్ పార్టీకి మద్దతుగా మాట్లాడుతున్నారు. సో…డీల్‌ కుదిరితే శశికళ మేనల్లుడు కూడా విజయ్ వెంట నడవొచ్చు. కేవలం హీరోగా తనకున్న క్రేజ్‌నే నమ్ముకోకుండా ఈ ఈక్వేషన్స్‌ అన్నీ చూసుకుంటున్నాడు విజయ్. కాలం కలిసొస్తే తమిళ రాజకీయాల్లో మరో అద్భుతం జరిగినా ఆశ్చర్యపడాల్సిన పన్లేదు.
