ట్రాఫిక్‌ జామ్‌తో వాహనాలు ఆగిపోతాయి. అరగంటనుకుంది.. గంట పడుతుంది. కాని ఆ నగరంలో ట్రాఫిక్‌ జామ్‌ కారణంగా ఏకంగా కంపెనీలు తట్టాబుట్టా సర్దుకునే పరిస్థితి వచ్చింది. ఆ ట్రాఫిక్‌ నరకాన్ని సరిదిద్దకపోతే ఇక అంతే అంటూ ప్రముఖులు కూడా నిష్టూరంగా నిలదీస్తున్న పరిస్థితి. ఒక్కప్పుడు గార్డెన్ సిటీ ఆఫ్‌ ఇండియాగా పేరు తెచ్చుకున్న బెంగళూరు నేడు ప్రపంచంలోనే మూడో అతి పెద్ద వరస్ట్‌ ట్రాఫిక్‌ సిటీగా మారిపోయింది. ట్రాఫిక్‌ జామ్స్‌తో గంటలకొద్దీ సమయాన్ని రోడ్లపైనే గడపాల్సి వస్తోంది. ప్రజలు రోడ్లపై చిక్కుకుపోవడంతో బెంగళూరు నగరం ఏటా ఎంత నష్టపోతోందో తెలుసా.. ఏకంగా 20వేల కోట్ల రూపాయలు.
బెంగళూరు మొత్తం కలిపితే రోజు కనీసం 800 కిలోమీటర్ల ట్రాఫిక్‌ జామ్‌ ఉంటుందంటే అర్థం చేసుకోవచ్చు అక్కడి రోడ్డు మీద ప్రయాణం ఎలా ఉంటుందో. గుట్టలపై ఉన్న హరళూరు, కడుబీసనహళ్లి వంటి కొన్ని గ్రామాలతో బెంగళూరు ఏర్పడింది. వచ్చే దశాబ్దానికి బెంగళూరు ఏర్పడి ఐదొందల ఏళ్లవుతుంది. అక్కడ చాలా ప్రాంతాల్లో రోడ్ల విస్తరణకు అవకాశం లేదు. కానీ అదే సమయంలో భవనాలు, ఆకాశహర్మ్యాలు మాత్రం లెక్కలేనన్ని ఉన్నాయి. బెంగళూరుకు చెందిన లాజిస్టిక్స్‌ టెక్‌ కంపెనీ బ్లాక్‌బక్‌ – కోఫౌండర్‌, CEO రాజేశ్ యాబాజీ చేసిన ట్వీట్‌ బెంగళూరులో ట్రాఫిక్‌ పరిస్థితిని కళ్లకు కడుతోంది.
తొమ్మిదేళ్లు బెంగళూరు బెలందూరులోనే తన ఇల్లు, ఆఫీసు ఉందని, కాని ఇప్పుడక్కడ ఉండటం కష్టంగా మారిందని ఎక్స్‌ వేదికగా రాజేశ్ చేసిన ట్వీట్‌ రాజకీయంగా కలకలం సృష్టిస్తోంది. రోడ్లన్నీ గోతులు, దుమ్ముతో నిండిపోయి ఉంటాయని చెప్పడమే కాదు వాటిని బాగు చేయాలనే ఆలోచన ఎవరికీ లేదని రాజేశ్ ఆవేదన వ్యక్తం చేశారు. అంతే కాదు వచ్చే ఐదేళ్లలో ఈ పరిస్థితి మారే సూచన కూడా లేదన్నారాయన. అందుకే ఇక్కడినుంచి వెళ్లిపోవాలని నిర్ణయించుకున్నట్టు రాజేశ్ ఎక్స్‌ వేదికగా బెంగళూరు బాధలు వెళ్లబోసుకున్నారు.
బెంగళూరులో బతకడం కష్టమని అన్నాడో లేదో.. హ్యాపీగా వైజాగ్‌కి వచ్చేయండని ఎక్స్‌ వేదికగా రాజేశ్‌కు ఏపీ మంత్రి లోకేష్‌ ఆహ్వానం పలికారు. దేశంలోనే ఐదో అతి పరిశుభ్రమైన నగరం వైజాగ్‌ అని, మహిళలకు సురక్షితమని, అత్యుత్తమ మౌలిక సదుపాయాలను తాము నిర్మిస్తున్నామని లోకేశ్‌ ట్వీట్‌లో వివరించారు. పొరుగురాష్ట్రం వెల్‌కం చెబుతుంటే కర్నాటక డిప్యూటీ సీఎం రియాక్షన్‌ మరోలా ఉంది. బెంగళూరు టెక్‌ కంపెనీ సీఈవో పోస్ట్‌పై డీకే శివకుమార్ ఘాటు వ్యాఖ్యలు చేశారు. కర్ణాటక ప్రభుత్వం ఇలాంటి బెదిరింపులు, బ్లాక్‌మెయిల్స్‌ని పట్టించుకోదంటూ కామెంట్ చేశారు.
ఇలాంటి కామెంట్స్‌ రావద్దనకుంటే, పొరుగురాష్ట్రాలకు అవకాశం ఇవ్వకూడదనుకుంటే రోడ్లు బాగుచేయాలి. ట్రాఫిక్‌ని కంట్రోల్‌లో పెట్టాలి. అదొదిలేసి సిద్దరామయ్య ప్రభుత్వం రోమ్‌ చక్రవర్తిలా ఫిడేల్‌ వాయిస్తోంది.
