ట్రంపరితనం ఒంటరిని చేసేలా ఉంది. మిత్రదేశాలకు కూడా దూరం చేసుకుని ఎందుకిలా నా ఖర్మ కాలిపోయిందని తలబాదుకుంటున్నాడు అమెరికా అధ్యక్షుడు ట్రంప్. ధిక్కారము సైతునా అంటూ భారత్‌పై ఏకంగా 50శాతం సుంకాలు వేసిన ట్రంప్.. తెగేదాకా లాగినందుకు ఇప్పుడు పశ్చాత్తాపపడుతున్నారు. భారత్‌ అమెరికాకు దూరమై చైనాకు దగ్గరవుతోందని మధనపడుతున్నారు.
సుంకాలతో దెబ్బతీసిన అమెరికా అధ్యక్షుడు ట్రంప్ భారత్‌ దూరమైనందుకు బాధపడుతున్నారు. భారత్‌తో పాటు రష్యా కూడా దూరమైనట్లే భావిస్తున్నారు ట్రంప్ . SCO సదస్సులో మోదీ, పుతిన్‌, జిన్‌పింగ్‌ చెట్టపట్టాలేసుకుని ఉన్న ఫోటోను తన సోషల్‌ మీడియా ప్లాట్‌ఫామ్‌లో షేర్‌ చేశారు ట్రంప్. కాస్త ఉక్రోషంగానే కామెంట్‌ చేశారు. కానీ భారీ సుంకాలు విధించి భారత్‌ని దూరం చేసుకున్నందుకు లోలోన ఆయన బాధపడుతున్నారు. తన తీరుతోనే బద్దశత్రువులైన భారత్‌ , చైనా ఏకమైనట్టు ట్రంప్ భావిస్తున్నారు.
భారత్‌, రష్యా, చైనా లాంటి శక్తివంతమైన దేశాలు ఏకం కావడం అమెరికాకు నష్టమని అగ్రరాజ్యంలోని పలువురు ఆర్థిక, రాజకీయ విశ్లేషకులు అభిప్రాయపడుతున్నారు. మరోవైపు అమెరికాలోని ప్రముఖ టెక్నాలజీ సంస్థల అధిపతులు, సీఈవోలకు అధ్యక్షుడు డొనాల్డ్‌ ట్రంప్ విందు ఇచ్చారు. వైట్‌హౌస్‌లో మెలానియా ట్రంప్ ఆధ్వర్యంలో జరిగిన ఏఐ ఈవెంట్‌ అనంతరం ఈ డిన్నర్‌ ఏర్పాటు చేశారు. బిల్‌గేట్స్‌, టిమ్‌కుక్‌, సుందర్‌ పిచాయ్‌, జుకర్‌బర్గ్‌, సత్యనాదెళ్ల వంటి టెక్‌ దిగ్గజాలు ఈ మీటింగ్‌కి హాజరయ్యారు.
అమెరికాలో పెట్టుబడుల గురించి టెక్‌ దిగ్గజాలను గుచ్చిగుచ్చి అడిగారు ట్రంప్. ఇన్నాళ్లూ మీరు ఇతర దేశాల్లో పెట్టుబడులు పెట్టింది చాలు. ఇక స్వదేశానికి తిరిగిరండని సూచించారు. అమెరికాలో ఎంత పెట్టుబడి పెడతారంటూ పనిగట్టుకుని ప్రతీ ఒక్కరినీ అడిగారు. ఈ మీటింగ్‌ తర్వాతే భారత్‌పై సానుకూల వ్యాఖ్యలు చేశారు. ప్రధాని మోడీ ఈ మార్పును స్వాగతించారు. ఒకవైపు మోడీ స్నేహితుడంటూ వ్యక్తిగత సంబంధాల గురించి ట్రంప్ మాట్లాడుతుంటే.. మరోవైపు ఆయన ప్రభుత్వంలో ఉన్నవారు, అధికారులు భారత్‌పై నిరంతరం ఆరోపణలు చేస్తూనే ఉన్నారు.
