బిహార్‌లో ఎన్నికలు ముగిశాయో లేదో లాలూ కుటుంబంలో లుకలుకలు మొదలయ్యాయి. ఆర్జేడీతోపాటు ఫ్యామిలీ నుంచి బయటికొచ్చినట్లు లాలూ కూతురు రోహిణి ప్రకటించింది. సోదరుడు తేజస్వీయాదవ్‌, ఆయన అనుచరులపై రోహిణి చేసిన కామెంట్స్‌ కాక రేపుతున్నాయి. లాలూ మరో ఇద్దరు కూతుళ్లతో పాటు.. ఆయన మరో కుమారుడు తేజ్‌ప్రతాప్‌ కూడా రోహిణీ ఆచార్యకు మద్దతివ్వడంతో లాలూ కొంప కొల్లేరయ్యేలా ఉంది.
ఆర్జేడీ అధినేత లాలూ ప్రసాద్‌ యాదవ్‌ పెంచి పోషించిన ఆర్జేడీ సామ్రాజ్యాన్ని కడుపున పుట్టిన పిల్లలే కుక్కలు చింపిన విస్తరిని చేసేశారు. బిహార్‌ ఎన్నికల తర్వాత రెండు రోజుల్లోనే ఆయన కుటుంబం నిలువునా చీలిపోయింది. ఆర్జేడీ పార్టీ నుంచి, కుటుంబం నుంచి బయటికి వచ్చేసినట్లు ప్రకటించిన లాలూ కూతురు రోహిణీ ఆచార్య.. తన సోదరుడు తేజస్వీయాదవ్‌పై తీవ్ర ఆరోపణలు చేసింది. ఆయన, ఆయన అనుచరులే తనను కుటుంబం నుంచి బయటికి పంపేలా చేశారని ఆరోపించింది.
సొంతపార్టీలోనే తీవ్ర అవమానం ఎదుర్కొన్నానని.. అసభ్యకరంగా తిట్టారని.. కొట్టేందుకు చెప్పులు ఎత్తారని తనకు ఎదురైన అనుభవాలను చెప్పుకొచ్చారు లాలూ కూతురు రోహిణీ ఆచార్య. అయితే ఆత్మగౌరవం, సత్యం కోసం అవమానాలను ఎదుర్కోవాల్సి వచ్చిందంటున్నారు లాలూ కూతురు. తండ్రి కోసం కిడ్నీ ఇస్తే డబ్బులు, టికెట్ కోసం కిడ్నీ ఇచ్చానని అవమానించారని కన్నీళ్లు పెట్టుకున్నారు. ఏ కుటుంబానికీ తనలాంటి కూతురు, సోదరి ఉండకూడదని కోరుకుంటున్నానని ఎక్స్‌ వేదికగా లాలూ కూతురు భావోద్వేగానికి గురయ్యారు.
సంజయ్‌యాదవ్‌, రమీజ్‌ఖాన్‌ కారణంగానే తాను కుటుంబాన్ని వీడినట్లు రోహిణీ ఆచార్య ప్రకటించారు. సంజయ్‌యాదవ్‌ ఆర్జేడీ ఎంపీ. రమీజ్‌ఖాన్‌ తేజస్వీయాదవ్‌ మిత్రుడు. ఉత్తరప్రదేశ్‌ ఎంపీ రిజ్వాన్‌ జహీర్‌కు అల్లుడు. తేజస్వీ టీమ్‌లో కీలకంగా,ఆర్జేడీ సోషల్‌ మీడియా హెడ్‌గా రమీజ్‌ఖాన్‌ వ్యవహరిస్తున్నారు. రోహిణీ ఆచార్య ఆరోపణల తర్వాత లాలూ ఫ్యామిలీలో సంక్షోభం మరింత ముదిరింది. రోహిణికి ఆర్జేడీ బహిష్కృత నేత, లాలూ మరో తనయుడు తేజ్ ప్రతాప్‌ యాదవ్‌తోపాటు.. ముగ్గురు అక్కాచెల్లెళ్లు మద్దతుగా నిలిచారు.
బిహార్‌ అసెంబ్లీ ఎన్నికల ఫలితాల తర్వాత లాలూ కుటుంబంలో తీవ్ర ప్రకంపనలు రేగుతున్నాయి. ఒకవైపు పార్టీ ఘోరంగా ఓడిపోయి బాధలో ఉంటే.. కుటుంబంలో చీలికతో కూతుళ్లు ఒకరి వెంట ఒకరు ఇంటిని విడిచి వెళ్లిపోవడం లాలూను మరింత ఉక్కిరిబిక్కిరి చేస్తోంది. ఒకప్పుడు బిహార్‌లో ఓ వెలిగిన లాలూ ఇల్లు ఇప్పుడు బోసిపోతోంది. చేతులు కాలాక ఆకులు పట్టుకున్నట్లు ఇకపై పార్టీ మంచీచెడ్డా తాను చూసుకుంటానంటున్నాడు కాటికి కాళ్లుచాపిన లాలూ.
