తూటాకు తూటానే సమాధానం. కన్నుకు కన్నే అక్కడి సిద్ధాంతంం. యోగి ఇలాకాలో బుల్డోజర్‌ రోడ్డెక్కినా, తుపాకీ లోడ్‌ అయినా ఖేల్‌ ఖతం. హీరోయిన్‌ దిశా పటానీ ఇంటిపై కాల్పులకు తెగించిన ఇద్దరు గ్యాంగ్‌స్టర్లను కూడా అదే ఫార్ములాలో లేపేసింది యూపీ పోలీస్‌. నేరస్తులకు కులం, మతం ఉండవు. ఎవడైనా ఒకటే. యూపీ పోలీసులు ఎన్కౌంటర్ చేసిన ఇద్దరిలో ఒకడు రవీందర్ సన్నాఫ్ కల్లు, ఇంకొకడు అరుణ్ సన్నాఫ్ రాజేందర్. ఇద్దరూ హర్యానా యువకులు. రోహిత్ గోదారా-గోల్డీ బ్రార్ గ్యాంగ్ సభ్యులు.
ఉత్తరప్రదేశ్‌లోని బరేలీలో ఉన్న దిశాపటాని ఇంటి దగ్గర తెల్లవారుజామున ఇద్దరు అగంతకులు బైక్‌పై వచ్చి నాలుగు రౌండ్లు కాల్పులు జరిపారు. ఎవరూ గాయపడకపోయినా సంచలనం సృష్టించిందీ ఇన్సిడెంట్‌. కాల్పులకు గోల్డీ బ్రార్ ముఠా బాధ్యత వహించింది. కొంతమంది హిందూ సాధువులను దిశా పటానీ సోదరి ఖుష్బూ అవమానించిందని, దానికి నిరసనగానే కాల్పులు జరిపినట్లు సోషల్ మీడియాలో ఆ గ్యాంగ్ ఓ పోస్ట్ పెట్టింది. ఇది జస్ట్‌ ట్రైలర్.. మరెవరైనా ఇలా మాట్లాడితే తీవ్ర పరిణామాలు ఉంటాయని ఆ గ్యాంగ్ వార్నింగ్‌ ఇచ్చింది.
అమ్మాయిల లివిన్ రిలేషన్‌పై అనిరుద్ధాచార్య చేసిన వ్యాఖ్యలను తప్పుబడుతూ ఇన్‌స్టాలో వీడియో పోస్ట్ చేసింది ఖుష్బూ. అందులో ఓ అభ్యంతరకర పదాన్ని వాడింది. ఆర్మీ మాజీ ఆఫీసర్ ఖుష్బూ ప్రస్తుతం ఫిట్‌నెస్‌ ట్రైనర్‌గా ఉన్నారు. దీంతో కాల్పుల ఘటన తర్వాత దిశా పటానీ ఫ్యామిలీ బ్యాక్‌గ్రౌండ్‌ మీద, సనాతన ధర్మంపై ఆ కుటుంబ వైఖరిపై దేశవ్యాప్తంగా చర్చ మొదలైంది. కాల్పులను కొందరు సమర్ధిస్తే.. కొందరు వ్యతిరేకించారు. కట్‌చేస్తే తుపాకులు ఎక్కుపెట్టిన ఆ ఇద్దరూ యూపీలోని ఘజియాబాద్‌లో ఎన్‌కౌంటరయ్యారు.
కాల్పులకు పాల్పడ్డవాళ్లు పాతాళంలో ఉన్నా పట్టుకుంటామని, వాళ్ల పని పడతామని దిశాపటానీ తండ్రికి యూపీ సీఎం యోగి హామీ ఇచ్చారు. ఆ మరుసటి రోజే ఎన్కౌంటర్ జరగడం, ఇద్దరూ చనిపోవడం ఆసక్తికరం. యోగి పాలనలో నేరస్తుల ముసుగులో కేవలం ఓ మతాన్నే టార్గెట్‌చేసుకుంటున్నారని జరుగుతున్న ప్రచారం ఈ ఎన్‌కౌంటర్‌తో తేలిపోయింది. ఎవడైతేనేం యూపీ ఇలాకాలో తలెగరేశారో.. తెగిపడుద్దంతే!
