నేపాల్‌లో మితిమీరిన పొలిటికల్ కరప్షన్‌ని భరించలేక.. జెన్‌జీ ఉద్యమం పుట్టుకొచ్చి ప్రభుత్వాన్నే కూల్చిపారేసింది. 70 మంది ప్రాణాలు కోల్పోయినా.. అప్పటి జెన్‌జీ మూమెంట్‌ ప్రపంచం మొత్తాన్నీ ఎట్రాక్ట్ చేసింది. ఇప్పుడది మెక్సికోకు కూడా వ్యాపించింది. మేడమ్ ప్రెసిడెంట్ గోబ్యాక్ అంటూ హింసకు దిగింది ఈ తరం యువతరం.
మెక్సికో అధ్యక్షురాలితో ఓ అపరిచిత వ్యక్తి అనుచితంగా ప్రవర్తించాడు. దేశాధ్యక్షురాలికే బయట ఇలాంటి అనుభవం ఎదురుకావడం ప్రపంచాన్ని ఆశ్చర్యపరిచింది. ఆ క్షణంలో ప్రెసిడెంట్ క్లాడియా షిన్‌బామ్ తేలిగ్గా తీసుకున్నా.. తనపైనే ఇలా జరిగితే దేశంలోని మహిళల సంగతేంటని తర్వాత దీనిపై వాపోయారు. ఇలాంటి ఉన్మాదుల్ని ఉపేక్షించబోమంటూ చట్టాలు కూడా మార్చబోయారు. అయితే మెక్సికో యువత ఇప్పుడు అధ్యక్షురాలికి మరో రకంగా సినిమా చూపిస్తున్నారు.
మేడమ్ ప్రెసిడెంట్ నువ్వు మాకొద్దు అంటూ, ప్రభుత్వానికి వ్యతిరేకంగా రోడ్లపైకొచ్చి నిరసనతో హోరెత్తిస్తున్నారు వేలాదిమంది యువకులు. చూస్తుండగానే మెక్సికోలో హింసాత్మకంగా మారింది జెన్‌జీ తిరుగుబాటు.నేరాలు, హింసను అరికట్టడంలో ప్రభుత్వం విఫలమైందని, మాదకద్రవ్యాల వ్యాపారులతో కుమ్మక్కయ్యారని అధ్యక్షురాలు క్లాడియా షీన్‌బామ్‌పై తీవ్ర ఆరోపణలు చేస్తూ ఆమె రాజీనామాకు డిమాండ్ చేస్తున్నారు. అధ్యక్ష భవనమైన నేషనల్ ప్యాలెస్‌లోకి దూసుకెళ్లేందుకు ఆందోళనకారులు ప్రయత్నించారు. ఇనుప కంచెలను ధ్వంసం చేశారు.
మెక్సికోలో జెన్‌జీ ఉద్యమం ఇంతలా ఎగసిపడ్డానికి పెద్ద కారణమే ఉంది. ఇటీవలే మెక్సికోలోని మికోకాన్‌లో ఉరుపాన్ నగర మేయర్ దారుణ హత్యకు గురయ్యాడు. నేరాలకు వ్యతిరేకంగా పోరాడుతున్న ఆయన్ని ఓ పబ్లిక్‌ ప్రోగ్రామ్‌లోనే దుండగులు కాల్చి చంపారు. ఈ హత్యతో దేశవ్యాప్తంగా యువతలో ఆగ్రహం పెల్లుబికింది. హింసను అరికట్టడంలో అట్టర్‌ఫ్లాప్ అయ్యారంటూ అధ్యక్షురాలిపై ఇలా యుద్ధానికి దిగేశారు.
