హిడ్మా ఎన్‌కౌంటర్‌తో మావోయిస్టుల వెన్ను విరిగినట్లయింది. ఆపరేషన్ కగార్‌తో పార్టీ జనరల్ సెక్రటరీ నంబాల కేశవరావు, హిడ్మా సహా పలువురు అగ్రనేతలు ఎన్‌కౌంటర్లలో హతమయ్యారు. మల్లోజుల వేణుగోపాల్, ఆశన్న, చంద్రన్న లాంటి కీలక నేతలు లొంగిపోయారు. అయితే మిగిలిన మావోయిస్ట్ పార్టీ కీలక నాయకుల ఆచూకీ మాత్రం ఇంకా దొరకడం లేదు. దండకారణ్యంలో ఉంటూ మూడు దశాబ్దాలకు పైగా అలుపెరగని పోరాటం చేసిన లీడర్లంతా ఎక్కడున్నారో ఎవరికీ అంతుచిక్కడం లేదు. ఉద్యమంలో కీలకపాత్ర పోషిస్తున్న తెలంగాణకు చెందిన ముప్పాళ్ల లక్ష్మణరావు అలియాస్ గణపతి, తిప్పిరి తిరుపతి అలియాస్ దేవ్ జీ, మల్ల రాజిరెడ్డి అలియాస్ సంగ్రామ్‌, పాక హనుమంతు అలియాస్ గణేశ్‌, బడె చొక్కారావు అలియాస్ దామోదర్ జాడ తెలియడం లేదు.
హిడ్మా.. ఎర్రదండులో ఓ చరిత్ర!
ముప్పాళ్ల లక్ష్మణరావు అలియాస్ గణపతి ఉద్యమంలోకి వెళ్లి 50 ఏళ్లు దాటిపోయింది. జగిత్యాల జిల్లాకు చెందిన గణపతి 1975లో దండకారణ్యంలోకి వెళ్లిపోయారు. 2004లో సీపీఐ ఎంఎల్, పీపుల్స్‌వార్, మావోయిస్ట్ కమ్యూనిస్ట్ సెంటర్ ఆఫ్ ఇండియా విలీనం ద్వారా సీపీఐ మావోయిస్ట్ పార్టీ ఏర్పాటులో కీలక పాత్ర పోషించారు. అనారోగ్య కారణాలతో పార్టీ చీఫ్‌ బాధ్యతల నుంచి వైదొలిగి నంబాల కేశవరావును జనరల్ సెక్రటరీ చేశారు. ఆ తర్వాత గణపతి ఎక్కడనేది ఇప్పటికీ అంతుచిక్కని ప్రశ్నే.
ములుగు జిల్లాకు చెందిన బడే చొక్కారావు అలియాస్ దామోదర్ మావోయిస్ట్ ఉద్యమంలోకి వెళ్లి 30 ఏళ్లు దాటింది. ప్రస్తుతం ఆయన పార్టీ రాష్ట్ర కార్యదర్శిగా ఉన్నారు. అన్ని రాష్ట్రాల్లో కలిపి ఆయనపై 2 కోట్ల రివార్డ్ఉంది. జగిత్యాల జిల్లా కోరుట్లకు చెందిన తిప్పిరి తిరుపతి అలియాస్ దేవ్‌జీ మావోయిస్ట్ పార్టీలో చేరి 40 ఏళ్లుదాటింది. దేశంలో రూ.3.6 కోట్ల అత్యధిక రివార్డ్ కలిగిన మావోయిస్ట్ లీడర్. ప్రస్తుతం పార్టీ జనరల్ సెక్రటరీగా ఉన్నారు దేవ్‌జీ. ఆపరేషన్ కగార్‌తో దండకారణ్యం వదిలి మైదాన ప్రాంతానికి వచ్చి పోలీసుల చేతికి చిక్కినట్టు ప్రచారం జరుగుతోంది. కానీ ఈ విషయంపై పోలీసులు ఎలాంటి ప్రకటన చేయడం లేదు.
మావోయిస్టు ఉద్యమంలో తెలంగాణకు చెందిన నేతలే ఇప్పటికీ కీలక పాత్ర పోషిస్తున్నారు. రాష్ట్రానికి చెందిన 59 మంది మావోయిస్టులు ఇంకా అజ్ఞాతంలో ఉన్నారు. వారిలో ఐదుగురు కేంద్ర కమిటీ సభ్యులతో పాటు రాష్ట్ర కమిటీలో 10 మంది ఉన్నారు. మొన్నటి వరకూ మావోయిస్ట్ పార్టీ సెంట్రల్‌ కమిటీ మెంబర్లు 13 మంది ఉంటే..వారిలో 8 మంది తెలంగాణ వాళ్లే. వీరిలో గతంలో ఇద్దరు లొంగిపోగా, ఇటీవల జరిగిన పరిణామాలతో మల్లోజుల వేణుగోపాల్, ఆశన్న ఆయుధాలతో సరెండర్ అయ్యారు. ఇక మిగిలిన నలుగురు ఇంకా మావోయిస్ట్ ఉద్యమంలోనే కొనసాగుతున్నారు. వాళ్లంతా కూడా మూడు దశాబ్దాలుగా పోరుబాటలోనే ఉన్నారు. వారిని కూడా లొంగుబాట పట్టిస్తే ఇంక మావోయిస్ట్ ఉద్యమం ముగిసినట్టే.
