రాజకీయాల్లో ప్రత్యర్థి పార్టీలపై విమర్శలు, ఆరోపణలు చేయడం సహజం. కానీ రాజకీయాలందు తమిళ రాజకీయాలు వేరు. అధికారపక్షానికి రాజకీయ ప్రత్యర్థి అన్నాడీఎంకే కాదు. గవర్నర్‌పైనే రోజూ విమర్శలతో విరుచుకుపడుతోంది స్టాలిన్ ప్రభుత్వం. తమిళనాడు సీఎం స్టాలిన్‌కి, రాష్ట్ర గవర్నర్ ఆర్‌ఎన్‌ రవికి మధ్య మాటలయుద్ధం లేని రోజంటూ లేదు. రాజ్‌భవన్‌లో ఉండి అధికార డీఎంకేకు వ్యతిరేకంగా అసత్యాలు ప్రచారం చేస్తున్నారని..రాష్ట్రం ప్రతిపాదించిన బిల్లులను గవర్నర్ ఆమోదించడంలేదంటున్నారు స్టాలిన్. రాష్ట్రంలో విద్య, శాంతి భద్రతలు, మహిళల భద్రతపై నిరాధార ఆరోపణలతో గవర్నర్ భయాందోళనలు సృష్టిస్తున్నారనేది స్టాలిన్ మరో ఆరోపణ.
ప్రజా వేదికలపై గవర్నర్ అసహనం వెళ్లగక్కుతున్నారని, కేంద్ర ప్రభుత్వం గవర్నర్ ద్వారా తమిళనాడులో చౌకబారు రాజకీయాలు చేస్తోందని డీఎంకే భావిస్తోంది. గతంలోనూ తమిళనాట గవర్నర్ వర్సెస్ సీఎం ఎపిసోడ్ నడిచింది. చెన్నైలో జరిగిన హిందీ మంత్ ఈవెంట్‌లో గవర్నర్ రవి సమక్షంలో తమిళనాడు రాష్ట్ర గీతమైన తమిళ థాయ్ వాజ్తు పాటలో ద్రావిడ అనే పదాన్ని పరిహరించడంపైనా వివాదం రేగింది. కావాలనే గవర్నర్ రవి రాష్ట్ర గీతంలో ద్రవిడ అన్న పదాన్ని వదిలేసి పాడారని డీఎంకే ఆరోపించింది. దీనిపై సోషల్ మీడియాలో పెద్ద ఎత్తున చర్చ కూడా జరగడంతో.. ప్రసార భారతి క్షమాపణలు చెప్పింది. అసెంబ్లీ సెషన్‌లో జాతీయగీతాన్ని పెట్టలేదని గవర్నర్ రవి వాకౌట్ చేశారు. ఇలా వరుస ఘటనలు రాజ్ భవన్, సీఎం ఆఫీసు మధ్య మరింత గ్యాప్ పెంచాయి.
తమిళనాడు గవర్నర్‌గా కాకుండా బీజేపీ నేతగా రవి వ్యవహరిస్తున్నారని, కేంద్ర ప్రభుత్వ ఎజెండాను అమలు చేస్తున్నారని డీఎంకే ఆరోపిస్తోంది. ద్రావిడ భావజాలానికి వ్యతిరేకంగా రవి వ్యవహరిస్తున్నారని స్టాలిన్ మండిపడుతున్నారు. అంతేకాదు బిల్లుల ఆమోదంపైనా గవర్నర్ రవి వివక్ష చూపుతున్నారని, ఏఫైల్ పంపినా సకాలంలో ఆమోదించకపోవడంతో రాష్ట్ర అభివృద్ధి ప్రాజెక్టులు నిలిచిపోతున్నాయని డీఎంకే సర్కార్ ఆరోపిస్తోంది. అయితే డీఎంకే ఆరోపణలను గవర్నర్ రవి ఖండిస్తున్నారు. తాను ఏరాజకీయ పార్టీకి అనుకూలంగా వ్యవహరించడంలేదంటున్నారు. రాజ్యాంగబద్దమైన పదవిలో ఉన్న తాను కేవలం తన విధులు మాత్రమే నిర్వహిస్తున్నానని గవర్నర్ వాదిస్తున్నారు. గవర్నర్ వర్సెస్ సీఎం ఎపిసోడ్ తమిళనాడు అసెంబ్లీ ఎన్నికలపైనా ప్రభావం చూపేలా ఉంది.
