ఐబొమ్మ రవి..ఇప్పుడు తెలుగు రాష్ట్రాల్లో టాక్‌ ఆఫ్‌ది టౌన్‌గా మారాడు. ఎవడైనా దొంగ దొరికితే, చట్టప్రకారం శిక్షించండి అన్నది అన్ని వర్గాల నుంచి వచ్చే మాట. కానీ ఐబొమ్మరవిని దొంగ అంటూనే దేవుడుగా కీర్తిస్తోంది ప్రేక్షకుల లోకం. అసలు దొంగలు టాలీవుడ్‌లోనే ఉన్నారంటూ రివర్స్ అటాక్‌కు దిగుతున్నారు మరికొందరు. ఎవరి వాదన ఎలా ఉన్నా..ఇప్పుడు ఐబొమ్మరవి రాబిన్‌హుడ్‌తో పోల్చుతున్నారు.
ఐబొమ్మరవికి సోషల్ మీడియాలో రోజురోజుకు మద్దతు పెరుగుతోంది. సోషల్ మీడియా ప్లాట్‌ఫాంలలో ఐబొమ్మ ట్రెండింగ్‌లో ఉంది. పేదలు, మధ్య తరగతి వాళ్ల కోసమే పైరసీ చేశాడంటూ పోస్టులు పెడుతున్నారు. థియేటర్ రేట్లు భారీగా పెంచడం వల్లే ఐబొమ్మకు అలవాటు పడ్డామంటూ ట్వీట్లు కూడా వస్తున్నాయి. సామాన్యులకు అందనంత రేట్లు పెంచి థియేటర్లకు రానివ్వని పరిస్థితి తీసుకొచ్చింది టాలీవుడ్‌లోని కొందరు పెద్దలే అంటూ ఐబొమ్మరవిని వెనకేసుకొస్తోంది ప్రేక్షకలోకం. ఈరేంజ్‌లో ఐబొమ్మరవికి సపోర్ట్ వస్తుందని పోలీసులు, ఇటు టాలీవుడ్‌ పెద్దలు కూడా ఊహించలేదు.
‘చిల్లర’ మాటలు.. సి.కల్యాణ్
రవిని హీరోగా చూడటాన్ని సినిమా ఇండస్ట్రీ ఖండిస్తోంది. ఐబొమ్మలాంటి పైరసీ సైట్స్‌తో ఎంతోమంది ప్రొడ్యూసర్స్ తీవ్రంగా నష్టపోయారని, ఇలాంటి వాటికి సపోర్ట్ చేస్తే ప్రజల్లో తప్పుడు సంకేతాలు వెళ్తాయంటున్నారు నిర్మాతలు. ఐబొమ్మ రవిని సోషల్ మీడియా దేవుడిగా చూడటం మానుకోవాలంటున్నారు బన్నీవాస్ లాంటి నిర్మాతలు. మరో నిర్మాత సి.కల్యాణ్ అయితే ఒక అడుగు ముందుకేసి ఐబొమ్మరవిని ఎన్కౌంటర్ చేయాలంటూ సంచలన కామెంట్ చేశారు. ఇక డైరెక్టర్ రాంగోపాల్ వర్మ ఐబొమ్మరవినే కాదు, పైరసీ చూసేవాళ్లను కూడా శిక్షించాలంటూ మరో సెన్సేషన్ ట్వీటేశాడు. పైరసీని చూసే 100మందిని అరెస్ట్ చేయడమే కాదు, వారి పేర్లను కూడా పబ్లిష్ చేయాలన్నది ఆర్జీవీ డిమాండ్.
ఐ-బొమ్మ రవి అరెస్ట్‌పై సీనియర్ అడ్వొకేట్ CVL నరసింహారావు సంచలన వ్యాఖ్యలు చేశారు. ఐ బొమ్మ రవిని అంతా రాబిన్‌హుడ్‌లా చూస్తున్నారని, ప్రజలు ఇబ్బందులు పడితే.. సినిమాల్లో మాదిరిగా ఒకడు పుట్టుకొస్తాడని రవి నిరూపించాడన్నారు . సైబర్ క్రైమ్‌ను అడ్డుకునేందుకు ఐబొమ్మరవిని డిపార్ట్‌మెంట్‌లోకే తీసుకోవాలని అప్పీల్ చేసేదాకా వచ్చింది అతనికి సపోర్ట్.
