ఏమైందో తెలీదు గానీ వెస్ట్రన్‌ కంట్రీస్‌ వలసదారులపై విపరీతమైన కోపం, ద్వేషం పెంచుకుంటున్నాయి. అమెరికా, బ్రిటన్, జర్మనీ, ఆస్ట్రేలియా, ఫ్రాన్స్, పోలండ్‌, ఐర్లండ్‌, జార్జియా దేశాల్లో పరాయిదేశనుంచి పొట్టచేత పట్టుకుని వచ్చినవారిని శత్రువల్లా చూస్తున్నారు. వీధుల్లోకి వచ్చి ఆందోళనలు చేస్తున్నారు. మిగతా దేశాల వలసదారులతో పాటు భారతీయులను కూడా టార్గెట్ చేస్తున్నారు. ఎవరిపైనా జాత్యాహంకారం లేదంటూనే ఎవరి దేశానికి వాళ్లని వెళ్లిపొమ్మంటున్నారు.
బ్రిటన్‌నే తీసుకుంటే యూకేలో ‘యునైట్‌ ద కింగ్‌డమ్‌’ పేరుతో ఆందోళనలు జరుగుతున్నాయి. ఆ ర్యాలీకి ఏకంగా లక్షన్నర మంది వచ్చారు. ఈ ఆందోళనకు నాయకత్వం వహిస్తున్నవారు విచిత్రమైన వాదన వినిపిస్తున్నారు. ఈ వలసలు ఇలాగే కొనసాగితే 40 ఏళ్ల తరువాత.. బ్రిటన్‌లో బ్రిటిషర్స్‌ మైనారిటీలుగా మారిపోతారనేది వారి ఆందోళన. శతాబ్దం చివరి నాటికి బ్రిటన్‌లో ప్రతి ఐదుగురిలో ఒకరు ముస్లిం ఉంటారని ఆందోళన చేస్తున్నారు.
అంటున్నారని కాదు గానీ.. ఈమధ్య బ్రిటన్‌కు వలసలు విపరీతంగా పెరిగాయి. చట్టపరంగా వస్తే ఫర్వాలేదు గానీ.. అక్రమ వలసలు ఎక్కవయ్యాయి. వారిని శరణార్ధులుగా ప్రకటించి స్థానిక హోటల్స్‌లో ఉంచుతోంది బ్రిటన్ ప్రభుత్వం. చుట్టుపక్కల ఉండే స్థానికులు వలసదారుల కారణంగా ఇబ్బందులు ఎదుర్కొంటున్నారు. నేరాలు కూడా ఎక్కువగా జరుగుతున్నాయి. పైగా చిన్నచిన్న ఉద్యోగాలను కూడా అక్రమ వలసదారులు ఆక్రమించుకుంటున్నారన్న అసంతృప్తి పెరిగింది. అందుకే బయటి దేశాల వాళ్లను వెనక్కి పంపించేయాలనే డిమాండ్‌ గట్టిగా వినిపిస్తోంది. అయితే బ్రిటన్ ప్రధాని కీర్‌ స్టార్మర్‌ మాత్రం వలసదారులకు వ్యతిరేకంగా చేసే ఆందోళనలను పట్టించుకోబోమని అంటున్నారు.
వలసదారులకు వ్యతిరేకంగా జరుగుతున్న ఆందోళనల వెనక అమెరికన్‌ బిలియనీర్స్ ఉన్నారనే ప్రచారం జరుగుతోంది. ఎందుకంటే ఆందోళనకారుల్లో కొంతమంది ‘మేక్ అమెరికా గ్రేట్‌ అగైన్’ స్లోగన్‌ ఉన్న టోపీలు పెట్టుకున్నారు. మరికొందరు అమెరికా, ఇజ్రాయెల్‌ జెండాలతో కనిపించారు. ఇక మార్చ్‌ ఫర్‌ ఆస్ట్రేలియా పేరుతో ఆగస్ట్ 31న పెద్ద ఆందోళన జరిగింది ఆస్ట్రేలియాలో. సిడ్నీలో మొదలైన నిరసన దేశం మొత్తానికి పాకింది. ఇండియా నుంచి ఎక్కువమంది ఆస్ట్రేలియా వెళ్లేది చదువుకోడానికి, లేదా పెద్ద పెద్ద ఉద్యోగాలు చేయడానికి. 2013-2023 మధ్య 8 లక్షల 45 వేల మంది భారతీయులు ఆస్ట్రేలియా వెళ్లారు. కాస్ట్‌ ఆఫ్‌ లివింగ్‌ పెరిగింది. వలసదారుల వల్ల అక్కడ జీతాలు తగ్గాయి. ఇది ఆస్ట్రేలియన్లకు కోపం తెప్పిస్తోంది.
-
విదేశాంగశాఖ గణాంకాల ప్రకారం.. గత ఐదేళ్లలో భారతీయులపై 91 దాడులు జరిగాయి. 30 మంది చనిపోయారు. కెనడాలో అత్యధికంగా 27 దాడులు జరిగితే 16 మంది చనిపోయారు. అమెరికాలో 9 దాడులు జరిగితే.. 9 మంది చనిపోయారు. UKలో 12 జర్మనీలో 11 దాడులు జరిగాయి.
జర్మనీలో కూడా ఉద్యమం మొదలైంది. కేవలం భారతీయులపైనే కాదు వలసదారులెవరినీ అనుమతించవద్దని ఆందోళనలు చేస్తున్నారు. 2015 తరువాత నుంచి జర్మనీలో పరిస్థితులు మారాయి. సిరియా, ఆఫ్ఘనిస్తాన్‌లో ప్రభుత్వాలు కూలిపోయాక.. లక్షల మంది శరణార్ధులు జర్మనీకి వెళ్లారు. దాంతో స్థానికులకు ఉద్యోగాలు లేకుండా పోయాయి. దానికి తోడు నేరాలు, డ్రగ్స్‌ కేసులు కూడా పెరిగాయి. రైట్‌ వింగ్ పార్టీలు జర్మన్లకు మద్దతుగా, వలసలకు వ్యతిరేకంగా ఉద్యమాలు చేస్తున్నాయి. దీంతో అక్కడి ప్రభుత్వం వలసదారులకు అనుకూలంగా చేసిన బిల్లులను వెనక్కి తీసుకుంది.
ప్రపంచంలో వలసదారులపై ఒక్కసారిగా వ్యతిరేకత పెరగడానికి కారణం ట్రంప్‌. అమెరికాలో అమెరికన్లకే ఫస్ట్‌ ప్రయారిటీ అనేలా పాలసీలు తెచ్చారు. ఇది ఇతర దేశాల వాళ్లకు కూడా నచ్చింది. తమ ఉద్యోగాలు, తమ విద్యావకాశాలను విదేశీయులు లాక్కుంటున్నారనే వ్యతిరేకత మొదలైంది.అమెరికాలో ఆరుపదుల వయసున్న నర్సుపై దారుణంగా దాడిచేశారు. యూకేలో 20 ఏళ్ల సిక్కు యువతిపై సామూహిక అత్యాచారం చేశారు. ఐర్లాండ్‌లో కూడా ఈమధ్య భారతీయులపై దాడులు పెరుగుతున్నాయి.
అమెరికా, పశ్చిమదేశాల్లో వలసలపై వ్యతిరేకత తీవ్రస్థాయిలో పెరుగుతోంది. ఒకప్పుడు అమెరికాకే పరిమితమైన వలస వ్యతిరేకత ఇప్పుడు కెనడా, ఆస్ట్రేలియా, ఐరోపా దేశాలకు వ్యాపించడంతో వలస వెళ్లిన వారి భద్రత, భవిష్యత్తు ప్రశ్నార్థకంగా మారాయి. ఈ పరిణామాలన్నీ విదేశాల్లో విద్య, ఉద్యోగాల కోసం వెళ్లే భారతీయులపై ప్రతికూల ప్రభావం చూపుతాయని నిపుణులు హెచ్చరిస్తున్నారు. ఈ వలస వ్యతిరేక నిరసనలు ముదిరితే, భారతీయులే లక్ష్యంగా జాతి విద్వేష దాడులు జరిగే ప్రమాదం లేకపోలేదని నిపుణులు హెచ్చరిస్తున్నారు.
